حبي بس بالعقل .."كتبت //دكتورة دعاء محمد


".. حبي بس بالعقل .."
كتبت //دكتورة دعاء محمد
يعني ايه احب بس بالعقل ؟!! 
هقولك ازاى .. مش بقولك ألغي قلبك وحكمي عقلك بس لا حبي وافرحي وادي قلبك فرصته بس لازم يكون في حكمه م العقل .. ازاى ؟!!
_ لما تحبى حد بلاش يكون هو محور حياتك مش لانه ما يستاهلش .. لكن عشان ميتخنقش..
وعشان كمان لو اتخانقتوا متحسيش ان حياتك وقفت..!
الوجع اللى هتحسيه وقتها هيصعب عليكى حتى انك تسامحيه وتحاولى تحلى مشكلتك معاه..لان نفسك وهي محبطة هتصعب عليكى اكتر من زعلكوا من بعض ..
على عكس لو كانت الحياة بينكم وسطية..
اينعم الحب بيخليكى حابة انك تقدمى كل شىء وتركزي حياتك كلها حواليه وبتكونى مستمتعة وانتى بتعملى ده بس الفرح الزايد بيقابله حزن زيادة انتى مش قده وسهل جدا يحولك لشخصية عنيده تخسرك الشخص ده تماما .. 
خلى حياتك عبارة عن حلقة بتدور حواليكى وحطى فيها كل اهتماماتك وحبايبك, وأنتى أقفى فى النص وشكليها زى ما انتى عايزة..
اوعى تعكسى و تخلى اى شخص او اهتمام منهم هو اللى ف النص وانتى اللى تلفى حياتك حواليه! عشان لو اختفى حياتك كلها هتقف ..!
زي مثلا لو اديتك ورقة مكتوب عليها كلام وقربتها جدا من عنيكى هتشوفيها؟؟ بالتأكيد لأ.. لكن لو بعدتها شوية عن عنيكى هتشوفيها بوضوح.. اهو الناس كمان كده.. لازم تبعدى مسافة عشان انتو الاتنين تشوفوا بعض بصورة اوضح..
اينعم الحياة مش بالورقة والقلم.. بس تدبير الحياة بشكل وسطى فى الفرح والحزن بيخلى الواحد قادر يواجه صعوبات الحياة بفكر صافى ومعتدل ويقابل اى مشاكل باستعداد تام..دون احباط او تخبط فى كل التجارب اللى بعد كده..

حبي بس بالعقل ....صح؟!!
أحدث أقدم

إعلان أدسنس أول الموضوع

إعلان أدسنس أخر الموضوع