طبطب علي روحك.....بقلم الجميلة مها نور ..جريده اهرامات الشرق المصريه



طبطب علي روحك 
كتبت //مها نور
اوقات كتير بيجي لنا احاسيس ملغبطة وجعانا ممكن تخلينا نبكي وبحرقة من غير ما نفهم ايه سببها ولا جايه منين نفضل ندور وندعبس جوانا علي السبب اللي محسسنا بالحزن  منلاقيش حاسين ان في حاجة نقصانا بس مش لاقينها حاجه وجعانا بس مش لامسنها

لكن الحقيقة اللي كتير مننا مش واخد باله منها هي ان السبب اننا نسينا نفسنا وبطلنا نزورها ونطبطب عليها ونخدها في حضن قلبنا نسمعها ونعرف احتياجتها فبدأت تأن وتتألم وتحاول تفهمنا بس بردو مش واخدين بالنا بتقول لنا الحقوني ساعدوني محتاجه تحبوني وتشوفوني

للأسف نسينا روحنا في وسط مشاغلنا واشغالنا واهتماماتنا الخارجيه نسيناها ونسينا حبايبنا وبطلنا نرويهم ويرونا بالحب والأهتمام عشان ارواح ناس تانيه يمكن يكونوا معانا انهارده وبكره نَسينا، عشان لقمة العيش اللي بقينا متسلسلين فيها عشان احتياجات بتنتهي في لحظة  ارواحنا بتحتاج الحب والإهتمام والطبطبة والحضن الدافي مش للفلوس ولا الشغل ، الروح محتاجة الوقود اللي يخليها تنتعش وتفوق وتفرح عشان تقدر تكمل الحياة بابتسامه وسط كل الضغوط اللي بنتعرض ليها كل يوم  .

وعشان روحك تفضل فرحانه وحاسه انها عايشه لازم تحب وتتحب لازم تحس بقلب بيضمها وروحك تضمه يخاف عليك ويحس بوجعك وتعبك قبل ماتحس انت بيه مش لازم يكون حب عاطفي ممكن يكون حبك لاولادك واسرتك وحنيتهم عليك حبك لصديق (ة) بحق وحقيق مش صديق  مزيف زي بتوع اليومين دول، احنا كلنا محتاجين لبعض عشان نقدر نعيش لو كل حد حب بجد واعلن عن حبه للي بيحبه عمرنا ما هنحس باحاسيس سلبيه توجعنا ولا هنحس بالعطش للحنيه والدفا بس المهم نختار صح واوعي تختار وانت محتاج وعطشان لان وقت العطش هتختار السم بدل المايه ومش هتحس بيه غير بعد فوات الأوان

 انا عارفه ان الدنيا بقت زي القطار بتجري مبتقفش غير في محطة النهاية خلتنا ننسي نقرب ونطبطب علي ارواحنا وارواح اللي بنحبهم عشان نقدر نعيش وسط الظروف الصعبة اللي بنعيشها بس لازم نحاول نفتكر روحنا وسط كل الوجع والسباق اللي بنجري فيه لازم نقف ناخد نَفسنا عشان نقدر نكمل، حاول تنزل في اي محطه حتي لو هتخسر تذكرتك ومد ايدك للي بتحبهم قبل فوات الأوان ساعتها بس روحك هتفرح وهتسي كل الاحاسيس السلبيه والوجع اللي مالي قلبك ومش عارف ايه سببه وهتقدر تكمل وانت فرحان ومفرح اللي بتحبهم وبيحبوك

أحدث أقدم

إعلان أدسنس أول الموضوع

إعلان أدسنس أخر الموضوع